Ensi fu ceste bataille desconfite que vous aves oy, qui fu es camps de Maupetruis a deux liewes de le cite de Poitiers, le vingt unieme jour dou mois de septembre, l'an de grasce Nostre Signeur mil trois cens cinquante six. Si commenca environ heure de prime, et fu toute passee a none; mes encores n'estoient point tout li Engles qui caciet avoient, retourne de leur cace et remis ensamble:Et fu la morte, si com on recordoit adonc pour le temps, toute li fleur de la chevalerie de France: de quoi li nobles royaumes fu durement afoiblis, et en grant misere et tribulation eschei, ensi que vous ores recorder chi apres.