Lors respondi li rois et demanda au chevalier, qui s'appelloit messires Thumas de Nordvich: 'Messires Thumas, mes filz est il ne mors ne atieres, ou si blecies qu'il ne se puist aidier?' Cilz respondi: 'Nennil, monsigneur, se Dieu plaist; mais il est en dur parti d'armes: si aroit bien mestier de vostre ayde.' 'Messire Thumas, dist li rois, or retournes devers lui et devers chiaus qui ci vous envoient, et leur dittes de par moy qu'il ne m'envoient meshui requerre pour aventure qui leur aviegne, tant que mes filz soit en vie. Et dittes leur que je leur mande que il laissent a l'enfant gaegnier ses esporons; car je voel, se Diex l'a ordonne, que la journee soit sienne, et que li honneur l'en demeure et a chiaus en qui carge je l'ai bailliet.'